Mar 1 | KQC | STEP | Mina bi Sei di Mida Iesu Keriso di ago buni yomakai kora reyo.

b 1.2:Mal 3.1

c 1.3:Is 40.3 (LXX)

f 1.6:2 Kgs 1.8

g 1.11:Gen 22.2; Ps 2.7; Is 42.1; Mt 3.17, 12.18; Mk 9.7; Lk 3.22

h 1.15:Mt 3.2

i 1.22:Mt 7.28–29

j 1.39:Mt 4.23, 9.35

m 1.44:Lev 14.1–32

Mark 1

John Baptist yaku sina niyo

(Mt 3.1–12; Lk 3.1–18; Jn 1.19–28)

1 Mina bi Sei di Mida ^{▼▼1.1Bura bedakai biSei di Midanufa de.} Iesu Keriso di ago buni yomakai kora reyo. 2 Sei di ago nido amiye ini roka Isaiah yaku bura reyo: ^b

“Sei yaku ago niyo, ‘Yi buda rofu nai naivonaivo amiye ni feidegida.
Yi ida moi dogo reyaine.’
3 Amiye yokoi gagani autu sanari raka nido, ^c
‘Warika Amiye di ida dogo refa,
ini dibo ida moi rorobo rifa.’”
4 Ma John Baptist gagani autu sanari vegu no feresi moi etaga rina ma Sei yaku ini vegu no koite makuna di babatiso di ago ni rausi resi ina vene babatiso magamo. ^{▼▼1.4John Baptist gagani autu sanari...babatiso di ago ni rausi resi ina vene babatiso magamobura bedakaiJohn Baptist gagani autu sanari...babatiso di ago nigamonufa.} 5 Judea gagani tora noibanu vene tau ma Jerusalem vene tau ina rofu baigamadi. Ye ini vegu no ni rausi regamadi ma Jordan koruri babatiso regamo.

6 John di varuka bi kamelo ^{▼▼1.6 kamelo bi hosi kana; gagani autu sanari amiye di gugura fare moi didedi.} di ueta ma ini gagaba ukita maena bi boromakau di ini ro. Ini iruku bi kaufa ma kaoro di ona. ^f 7 Ma ini ago ni rausi reyo bi mini, “Na usi baigo amiye ini vava yaku nai vava etei riyo, ye ini yuka ro di yuka fafau di maena mina na bi rorobo de na yaku efuka odesi you negida. 8 Na yaku koru dudu ya babatiso reida, idu mina amiye bi Vima Kikifa dudu ya babatiso rego.”

Iesu di babatiso rena ma uka maina

(Mt 3.13—4.11; Lk 3.21–22; 4.1–13)

9 Mirona ituari Iesu bi Nazareth taoni Galilee eta rofu gutuna fereyo ma John yaku Jordan Koruri babatiso maro. 10 Iesu bi evade koru ideri gutuna bae iruruka resi nei reyo ri bi oma ekeyo ma Vima Kikifa bi pune erena kana ina fafau deyo. 11 Ma goroka yokoi omari gutuna dega niyo, “Ya bi nai uka maida mida; ada toragade ya rofu reida.” ^g

12 Ne ituari maka Vima Kikifa yaku gagani autu sanari Iesu ni feideyo. 13 Ma gagani autu sanari meda 40 amegamo ri Satani yaku no reyainedi vo nisi ini uka maina reyo. Ina bi tuma dona nadina sa amegamo ma Sei di naivonaivo vima yaku nari regamadi.

Iesu oyena rutu vene vana raro raka niyo

(Mt 4.12–22; Lk 4.14–15; 5.1–11)

14 John Baptist dibura yavari aiyadi fufuta rofu Iesu Galilee ri nesi Sei di ago buni ni rausi reyo. 15 Resi niyo, “Gua bi Sei di meda, ma Sei di ourefeidena amena sana bi atafu okigo. Yi vegu no feresi moi etaga rifa; ago buni rofu mokena vari gira aifa!” ^h

16 Iesu bi Galilee koru moka tora seriri nana digamo ri Simon ini usika Andrew sa veitao reyo. Ina remanu bi koruri fate makugamadi, adina ina bi oyena rutu vene. 17 Iesu yaku ina vene niyo, “Na usi baifo, amiye gokai rutu regedi di ida ya oteimagida.” 18 Minari maka ini fate feresi usi diyadi.

19 Bogamadi ri doba deri James, Zebedee di mida, ini usika John sa veyo. Ina yaku bouti fafau fate veika regamadi. 20 Iesu yaku evade uba dubuisa raka niyo ri ini baba Zebedee ma ini moimai vene boutiri feresi usi boyadi.

Amiye nokoi vima no sa

(Lk 4.31–37)

21 Iesu bi ini usi dina vene sa Capernaum taoniri boyadi, ma evade Sabati medari usausa yava ideri bosi amiye ni oteimagi kora reyo. 22 Amiye ini oteimana ago neideyadi ri bi tururu reyadi, adina bi vava nufa ago niyo, ago gira ni feidena vene kana de. ⁱ

23 Mina ituari maka amiye yokoi usausa yava ideri vima no ini rovaitari amegamo yaku raka niyo, 24 “Iesu Nazareth amiye, una rofu bi beika ura reisa? Ya bi una ukerova regika okiyo ba? Na na diba ya bi kaere — ya bi Sei di Kikifa Amiye!”

25 Iesu yaku ni kaka reyo, “Babo ni. Mina amiye rofu yakusi di!”

26 Vima no yaku mina amiye moi seko sako resi ababa nisi ini rovaitari yaku diyo. 27 Amiye tau bi tururu resi iniyeiniye ni kaiteyadi, “Mina bi beika? Mina bi oteimana di ida rua nokoi mini ini vava nufa! Vima no rofu ago gira mado ma ka ina rofu neidesi anema yora nidedi!”

28 Kamini evade Galilee gagani tora noibanuri ini ago urafo rei diyo.

Iesu amiye taugade moi buni riyo

(Mt 8.14–17; Lk 4.38–41)

29 Usausa yavari fereyadi ri evade James ma John sa Simon ma Andrew di yavari boyadi. 30 Simon di imokai rema bi gauka resi rovaita vakivaki regasa ekamari varegamo ma Iesu okiyo ri evade ni oteimaradi. 31 Ye mina rema rofu bosi ini vana moisi moi dadiyo. Rovaita vakivaki reyo bi sasaka reyo ma iruku dabara resi nari regamo.

32 Meda nei tomu niyo ma uru baiyo ri, amiye yaku gauka vene ma vima no ini rovaitari vai reyo vene Iesu rofu moi afei okiyadi. 33 Amiye tau kaere mina taoniri amededi mina yava ida nefauri okiyadi. 34 Ma Iesu yaku gauka vene taugade moi buni risi vima no taugade umeki reyo. Ina yaku vima no niyo ma ago de niyadi, adina diba niyadi ina bi kaere.

Iesu yaku Galilee gaganiri sina ni diyo

(Lk 4.42–44)

35 Uruyaku gorogoro meda youna koderi, Iesu bi dadisi yava feresi yaku deyo. Minari bi gagani autu sanari usausa nigi diyo. 36 Ye Simon ini asiyaka vene sa maina digamadi, 37 ma baku resi niyadi, “Amiye tauvakoi bi ya yaku maina rededi.”

38 Ye Iesu yaku ni kabai reyo, “Una bi berou rautu eta rofu boi negifa. Ma na bi ina vene sa ka ago ni rausi regida, adina na bi mina dada deyaka.”

39 Ye Galilee gagani tauvakoiri disi ini usausa yavari ago ni rausi regamo ma vima no umeki regamo. ^j

Iesu yaku amiye moi buni riyo

(Mt 8.1–4; Lk 5.12–16)

40 Refera amiye yokoi Iesu rofu okisi efuka odesi buni baku regi guyaguya niyo, “Ya ura reisa vo nisi, ya yaku na moi ruaka rigiya.” ^{▼▼1.40 na moi ruaka rigiya:Mina gauka yaku amiye moi kino redo.}

41 Iesu bi iriyeduka ^{▼▼1.41iriyeduka;bura bedakai bigubuyonufa.} resi ini vana moi roto risi mina amiye avaka moiyo. Ma ni kabai resi niyo, “Na ya ura reida, gua maka ruaka ni!” 42 Minari maka ini rovaitari refera gauka ferei diyo ma ruaka niyo. 43 Ye Iesu yaku ago gira rofu nisi evade maka ni feidesi 44 niyo, “Neide, amiye yokoi ga ni oteima. Evade negiya Sei ma amiye utari naivo amiye negauri ma yi rovaita veyaine. Ye amiye ya nigedi ya bi buni niyo Moses yaku niyo kana di ago gira moi ori sisika Sei rofu regiya.” ^m

45 Idu mina amiye yaku disi mina ago ni rausi rega gagani noibanuri digamo. Dada Iesu ina yaku ago toragade niyo mina taoni ideri dina bi de reyo. Idu ina bi gagani autu sanari amegamo, ye amiye gaganigagani noibanuri okisi ina vegamadi.